အချစ်သာပါပါစေ ။
အသွားအပြန်ဟာ
အပ်ဖျားတစ်ထောက်စာပဲ ဝေးတယ်
Expiry date မပါတဲ့ ဇောတွေက မောချင်စရာ ။
သောက်နေကျ Lemon Tea တံဆိပ်လေးကနေ
ဖိနပ်ကြိုးပေါ်က Pattern လေးတွေအဆုံး
ငါ့အိပ်ရာဝင်ချိန်တွေကို
မညှာမတာ ခလုတ်တိုက်နေလိုက်ကြတာ။
နဖူးပေါ်က အမာရွတ်လေးကရော
ငါ့အကြောင်းတွေးနေမလား မသေချာ...
သွယ်လျလျ လက်ချောင်းကလေးမှာ
လက်စွပ်အပါးလေးရှိသေးလား။
ငါ့ခေါင်းပေါ် တည့်တည့်ကျတဲ့
အမှောင်နဲ့ အရောင်တွေကို
လူကြားသူကြားထဲ လိုက်လိုက်သိမ်းနေရတဲ့
ယိုဖိတ်မှုတွေကပြဿနာ ။
လက်လွှတ်ဆုံးရှုံးမှုနဲ့
ရှက်ရွံသိမ်ငယ်မှုဟာ
ငါ့တစ်သက်လုံး အပိုင်ရခဲ့တဲ့အရာပဲ။
မြင်ရင်လည်းကြားတယ်
ကြားရင်လည်း မြင်တယ် ။
နာကျင်မှုတွေဟာ
စီမထားလည်း ညီပါတယ်
ညတိုင်းရဲ့ ညလည်စာဟာ
နားရွက်ထဲကို နားထင်ကနေဖြတ်ပြီး စီးတဲ့
မြစ်ပြင် ပူပူတွေ...။
အချစ်သာပါပါစေ။
တချို့ဆုတောင်းတွေအတွက်
ကြယ်တစ်လုံး ကြွေပေးစရာမလို
မနက်ဖြန် ရာသီဥတုသာယာပါစေ
စစ်ပွဲတွေငြိမ်းပါစေ
ချစ်သူနှစ်ဦး ပျော်ရွှင်စွာ ပေါင်းဖက်နိုင်ပါစေ ပေါ့...။ ။
- မိုးသက်ဦးလွင် -
(ဒါနောက်ဆုံးပါပဲ... )
Feb 6, 2023 (Monday)
0 comments:
Post a Comment
မိတ္ေဆြတို႔ရဲ႕ မွတ္ခ်က္က ကၽြန္ေတာ့္ရဲ႕ စာမူခလို႔ ဆိုလို႔ရသလို..
ေနာက္တစ္ပုဒ္ဖန္တီးဖို႔ အားေဆးတစ္ခြက္ေပါ့ဗ်ာ......