ဧည့်သည်

ဝမ်းနဲ့လွယ်ပြီး မွေးထုတ်လိုက်တဲ့အမေက

ကိုယ့်သားကိုယ် မမှတ်မိတော့တဲ့ ဇာတ်ဝင်ခန်းလို

ငါ့မြို့ကလေးဟာ ငါ့အပေါ် စိမ်းစိမ်းကားကား။

ရင်ခုန်သံသီချင်းဟောင်းကလေးဟာ

နောက်ဆုံးပေါ်တီးလုံးနဲ့ သီဆိုခွင့်မရှိတော့ဘူး

ယူကလစ်ရနံ့တွေနဲ့ မြင်းလှည်းခွာသံတွေက

မျိုးတုံးတော့မယ့် ရှားပါးမျိုးစိတ်တွေတဲ့

မျက်နှာစိမ်းဆိုတဲ့အကြည့်တွေကို

ကိုယ်မခံချင်ဘူး ချယ်ရီရယ်။

ငါ့အမေအိမ်မှာ ငါကဧည့်သည်

ငါ့အတိတ်တွေမှာ ငါတကယ်မရှိခဲ့သလိုမျိုး

ကိုယ့်အသက်ရှုသံကအစ သူစိမ်းဆန်နေသတဲ့

ပြင်ဦးလွင်...။

မိုးသက်ဦးလွင်