၂၀၁၇ တုန်းက ကျနော်တပ်ကုန်းမှာ Complex System Operator ရော ရုရှား-အင်္ဂလိပ် - မြန်မာ စကားပြန်ပါ တွဲလုပ်နေတဲ့အချိန်ပေါ့။ နေပြည်တော်တစ်ဝိုက်ဆိုတာ နွေရာသီမှာ ဒွါရကိုးပေါက် ချွေးတောက်တောက်ကျအောင် ပူသလောက် ဆောင်းတွင်းဆိုရင်လည်း ရှိတာအကုန် တိုဝင်လောက်အောင် အေးတာကလား။
ဒီက ရေမရောတဲ့ မေမြို့သားစစ်စစ်ကြီး၊ မော်စကိုရဲ့ ဖရီးဇင်းဝင်းတား ကိုတောင် ကျောလှန်ပြီးဘောကန်လာတဲ့ကောင်ကြီးဟာ နေပြည်တော်တပ်ကုန်းရဲ့ ဆောင်းတွင်းမှာတော့ မာမာချာချာမဖြစ်တော့ဘဲ အသားတွေပက်လာပါရောလား။ အသားပက်တာက အကြောင်းမဟုတ်ဘဲ ရိပ်သာကကျွေးတဲ့ မသထာရေစာတွေထဲမယ် ဗိုက်တာမင်ဘီတွေ ချို့တဲ့ပုံရပါတယ်။ ငယ်ငယ်ဖြစ်ဖူးတဲ့ ကျီးကန်းပါးစပ် (ရှမ်းလိုတော့ "ဆွတ်ဟီကိုင်" လို့ ခေါ်တယ်ဗျ။ မြန်မာလိုတော့ မပြောပြတာကောင်းပါတယ်) တွေ ဖြစ်ချင်သလိုဖြစ်လာပါရော...။
အဲ့ဒါနဲ့ မွေးသမိခင်ဆီ ဖုန်းဆက်တော့ "ကိုဟေးရေ အလှဆီတွေလိမ်း၊ အရောင်မပါတဲ့ နှုတ်ခမ်းနီတွေ ဆိုးလိုက်" တဲ့...။ (အမေက ကျနော့်ကို ကိုဟေး လို့ခေါ်တာပါ)
အဲ့ဒါနဲ့ပဲ အောက်က စတိုးဆိုင်ကိုပြေးပြီး နှုတ်ခမ်းနီ(ဒီနေရာမှာ နှုတ်ခမ်းဖြူလို့ သုံးရင် ထောက်လို့ နှုတ်ခမ်းနီလို့ပဲ ရေးပါရစေ) နှုတ်ခမ်းနီ အဖြူတောင့်ကို မေးဝယ်တော့တာပဲ။
ဆိုင်က ရွာဆိုင်ကလေးဆိုပေမယ့် ရန်-မန်း လမ်းဟောင်းဘေးမှာရှိတာရော၊ ဆိုင်ရှင်အန်တီကြီးက Facebook က တစ်ရာဖိုးသုံးပုဒ်တွေ ယုံပြီး ဆိုင်မယ် ထင်ရာမြင်ရာ အကုန်တင်ထားတာကြောင့်ရော၊ MLM တွေကထုတ်တဲ့ Successmore သွားတိုက်ဆေး တို့၊ သွေးတိုးကျ လက်ပတ် တို့ စတဲ့ ပစ္စည်းတွေ အတော်စုံပါတယ်။ (ရေးနေရင်း ခုခေတ်ဆို ကိုဗစ်မကူးတဲ့လည်ဆွဲ အထုတ်ကလေးတွေတောင် ရောင်းနေမလားတွေးမိနေသေးတယ်)
ကျနော်ကလည်း ပစ္စည်းဆို အကောင်းမှ သုံးချင်တဲ့ကောင်ဆိုတော့ လျှာရှည်တော်မူပြီး "အန်တီရယ် အရောင်မပါတဲ့ နှုတ်ခမ်းနီရှိရင်လည်း ဟိုအစ်ကိုကြီးတွေ ဝယ်သွားတဲ့ ပေါပေါပဲပဲ တရုတ်နှုတ်ခမ်းနီတွေ မပေးပါနဲ့၊ ကောင်းတာလေး ပေးပါ" ဆိုပြီး ကညော့လိုက်တော့ "ဒီဆိုင်မှာတော့ ဒါအကောင်းဆုံးပဲ ဗိုလ်ကြီးရေ" ဆိုပြီး အောက်ပုံမှာပြထားတဲ့ ကိုရီးယားစာလုံး ၃ ၄ လုံးပါတဲ့ နှုတ်ခမ်းအဖြူတောင့်လေးပေးလိုက်ပါတော့တယ်။
အဲ့ဒါနဲ့ပဲ အောက်ရွာထဲမှာ ညစာတွေဘာညာတွေ စားသောက်ပြီး အဆောင်ပြန်၊ ညဖက် မအိပ်ခင်မှာ အဲ့ဒီ နှုတ်ခမ်းနီအဖြူဘူးကလေးကို နှုတ်ခမ်းနဲ့အပြည့်ဆိုး၊ နှုတ်ခမ်းစောင်းတွေမှာ ကွဲချင်ချင်ဖြစ်နေတာဆိုတော့ နှုတ်ခမ်းစောင်းတွေပါ "ခိုး" ပြီး ပတ်လည်အားရပါရ ဆိုးချလိုက်ပါတော့တယ်။
မနက်လည်း လင်းရော အိပ်ရာက နိုးလာတဲ့အချိန် အခန်းဖော်စီနီယာနောင်တော်က ကျနော့်မျက်နှာကိုကြည့်ပြီး ခွက်ထိုးခွက်လှန် ရယ်ပါတော့တယ်။ အိပ်မှုံစုံမွှားဖြစ်နေရာကနေ သူရယ်နေတာမြင်တော့ ဘာဖြစ်နေမှန်းမရိပ်မိတဲ့ ကျနော်ဟာ အိပ်မက်လိုလို ဘာလိုလိုဖြစ်နေပါသေးတယ်။
နောက်တော့ ကျနော် အူလည်လည်ဖြစ်နေမှန်းသိတဲ့ ဘဲကြီးက သူအိပ်ခါနီး လိုးရှင်းလူးနေကျ ကြည့်မှန်အဝိုင်းကြီးကို ကျနော့်မျက်နှာကို ထိုးပေးလိုက်ပါတော့တယ်။
ရုတ်တရတ်ကြီး The Dark Knight ဇာတ်ကားထဲက Batman ရဲ့ မဟာရန်သူတော်ကြီး Jocker တစ်ယောက် ဘယ်လိုအတောင်ပံပေါက်ပြီး ၂ ခန်းတွဲ လိုင်းခန်းလေးရဲ့ ကုတင်ခြေရင်းမှာ စုဖုရားလတ်ထိုင်နည်းမျိုးနဲ့ ထိုင်နေတာများလဲ လို့တောင် တွေးမိသွားပါတယ်။ ရွာဆိုင်က အန်တီကြီးရောင်းလိုက်တဲ့ နှုတ်ခမ်းနီဟာ ညတုန်းကဖြူပြီး မနက်လင်းတော့ ဘယ့်နှာကြောင့် ရဲရဲ တွတ်နေရပါသလဲ ဆိုတဲ့ မေးခွန်းကို ကျနော် မဖြေတတ်တော့ဘူး။ ဘေးသားတွေပါ "ခိုး" ပြီး ဆိုးထားတာဆိုတော့ မျက်စိထဲသာ မြင်ကြည့်ပါတော့။ (ကိုယ့်ပုံကိုယ် တင်ဖို့ သတ္တိမရှိလို့ အောက်မယ် ကျနော်အဲ့ဒီအချိန်ကပုံနဲ့ တော်တော်တူတဲ့ Jocker ပုံကို တင်ပေးထားပါတယ်)
ကျနော့်ရဲ့ အိုင်ကျူ ၁၈၇ စူပါဦးနှောက်ကြီးနဲ့ လိုက်မမီတဲ့ မိန်းမတွေရဲ့ ခုဖြူနောက်နီ နှုတ်ခမ်းနီကြီးအကြောင်းတွေးနေတဲ့အချိန်ပဲ အခန်းဖော် စီနီယာ ဘဲကြီးဟာ စီနီယာပီသစွာနဲ့ပဲ အဆောင်ရှေ့ထွက်ပြီး "GP ကို လာကြည့်ကြပါဦးဟ ခိုင်ဇော်လင်းတို့ရေ" ဆိုပြီး အရပ်ကိုမောင်းခတ်ကြေငြာနေပါတော့တယ်။
သူ့အသံကြောင့် ဘေးခန်းကလူတွေ ထွက်မလာခင်စပ်ကြားမှာ အိမ်သာထဲကို ပြေးပြီး ဘေစင်က ရေနဲ့ဆေးချပေမယ့် ရွှေနှုတ်ခမ်းတော်အစုံက ပတ္တမြားခဲအလား ရဲရဲနီတဲ့ နှုတ်ခမ်းနီတွေဟာ တက်တူးထိုးထားသလို အရောင်တောင် လျော့မလာဘဲ ပိုတောင်ရဲသလာသလို ထင်လာရပါတယ်။
နောက်ဆုံးတော့ အရှက်နဲ့ သိက္ခာတို့ကို မငဲ့နိုင်တော့ဘဲ ကိုခိုင်ဇော်လင်းရဲ့ အမျိုးသမီးဆီက မိတ်ကပ်ဖျက်တဲ့ Towel အဝိုင်းကလေးတွေ၊ အရည်၊ အခဲ၊ သနပ်ခါး စသည်ဖြင့် မျိုးစုံတောင်းယူဖျက်ပေမယ့်လည်း ဘယ်လိုမှ မပျက်ခဲ့ပါဘူး။
အဲ့ဒါနဲ့ပဲ ရှေ့မျက်နှာနောက်ထားလို့ ဘေးခန်းက သင်တန်းမှူးဆီ သတင်းပို့ပြီး အဲ့ဒီနှုတ်ခမ်းနီတွေမပျက်မချင်း အဆောင်မှာသာ နေခွင့်ပေးပါရန် ခွင့်တောင်းပြီး နေခဲ့ရတော့တာပဲ။
နောက်တော့မှပဲ ဒီနှုတ်ခမ်းနီတွေက ၄ ရက်မြောက်နေ့မှ ဖြည်းဖြည်းချင်း မှိန်ပြီး ပျက်သွားတယ်။
အနည်းဆုံးတော့ ပတ်ဝန်းကျင်မှာ အရှက်အိုးဗြန်းဗြန်းကွဲခဲ့ပေမယ့် ကိုယ်ကျွမ်းမဝင်တဲ့ မိန်းမတွေရဲ့ ရှုပ်ထွေးဆန်းကြယ်တဲ့ ပစ္စည်းကိရိယာတွေနဲ့ ဝေးဝေးနေဖို့ သင်ခန်းစာတော့ရခဲ့တယ်ပေါ့လေ။
အောက်ကပုံကတော့ ကျနော်ဆိုးခဲ့ဖူးသော (ညဖြူ၊ မနက်နီ) နှုတ်ခမ်းနီအဖြူတောင့် နဲ့ ကိုဗစ်မဖြစ်ခင်ကတည်းက တစ်ပတ်လောက် Mask တပ်ခဲ့ရတဲ့ကျနော့်ပုံနဲ့ အဲ့ဒီကာလက ကျနော်အခွက်နဲ့ တစ်ထေရာတည်း တူနေတဲ့ Jocker ကြီးပုံပါပဲ။
